[size=1.25]巴別突擊塔第344集20240507文字完全版
(前略)
●無人敢提：究竟《九龍城寨》劇本有乜問題？
•但即使我點讚《九龍城寨》都好，佢都唔會響我心目中成為經典，因為佢嘅缺點亦係非常明顯：就係一流導演+一流美指+一流武打+（林峰）一流演技，偏偏卻遇上個垃圾劇本。客觀講除咗一啲唔太關鍵嘅修改，例如城寨班主角變咗唔係黑幫、大老闆同王九嘅關係唔同咗之類，基本上佢都算係忠於原著改編──問題係原著可以有三十幾期漫畫去舖墊主角之間嘅友情，但你套戲入面卻完全側重響古天樂救林峰、城寨生活、再引伸上一代佢同郭富城嘅恩怨情仇；
•要知道成套戲其實有仲有三條支線，包括任賢齊黃德斌果條兄弟線、洪金寶伍允龍果條奸角線，同埋頭先所講，四兄弟之間果條友情線，而家全部輕輕帶過就算──我係明白你搵得古天樂番黎，當然要將劇情側重響佢身上，但響咁嘅前提下又唔大執個劇本，成件事明顯就會顧此失彼。表面上的確四兄弟之間又有打牌、又有幫個阿媽報仇，但諗深一層，除咗林峰全部都無深刻描寫過，結果睇見佢地為救陳洛軍跛手跛腳果刻，我係完全無被觸動到任何情緒
•然後你走去睇番成個劇本：陳洛軍因為落難走入城寨，響入面感受到人間溫暖同古天樂建立起父子情、同劉俊謙建立兄弟情；點知原來佢係任賢齊個仇家個仔，於是洪金寶乘機就打入城寨，然後古天樂絕症死前捨身頂住追殺，陳洛軍僥倖走甩再番黎報仇，跟住打瓜咗大奸角伍允龍大團圓結局──基本上就係你完全估撚到劇情預測無驚喜，甚至最後我只想佢快撚啲完，因為實在老土到爆
•至於幾個角色我之前都話係演得好，但任賢齊、洪金寶全部都係臉譜化形象，好聽啲就係「恰如其份」囉。胡子彤同張文傑只屬配角無乜刻劃我可以理解，但劉俊謙入面除咗開頭揸電單車一幕同整幾下螳螂拳係好撚形之外，往後就只係充當一個傍友，根本無發揮空間。至於人人大讚嘅伍允龍，好心啦，今時今日仲邊可能係靠「瘋狂大笑」作為一個奸角嘅賣點架，你估歡樂今宵咩！本應要講到佢同洪金寶有幾可惡，就應該多啲描寫下一啲作威作福嘅劇情，但結果只係比個細路玩神打？有無兒嬉啲呀？
•仲有一個老實講都幾R爆頭嘅，就係由喬靖夫做嘅光頭雙刀佬角色。響原著入面佢其實係斬叉燒嘅，但響電影入面連呢Part都Cut埋，只係飾演一個比較好打嘅打手──喂你個四個兄弟本身都經已唔係好夠戲份啦，仲硬插個角色入去有分薄啲時間為乜？真正嘅原因我覺得只係因為基於某啲人情人事關係，夾硬加個角色入去，但咁樣真係對部戲係好事咩？
最後一幕決戰變科幻片？文青古惑仔不能並存
•其他例如「四五架私家車嘅人就足以佔領成個城寨？」、「伍允龍洪金寶根本唔駛任賢齊批准就可以佔領成個城寨，根本由頭到尾都係憑佢地實力吊打」嘅疑似犯駁位我都唔特別挑出黎講，但有一幕我真係頂唔撚順，就係最後同伍允龍打過段：即係無啦啦拎兩支AK出黎，仲要一槍都打唔撚中，係咪想向以前果堆三流港產片致敬？但最尾果下將伍允龍當棉胎咁撻、迫佢吞劍再打到佢內傷，老實講，係完全破壞哂之前成套戲建構果種「好扎實」嘅武術世界
•我當然明白導演／武指係想用最浮誇嘅方式黎突顯奸角果種無敵（但既然咁無敵一早就可以打撚死洪金寶啦），問題係你套嘢係江湖廝殺電影，誇張到一個地步就係會破壞咗當中嘅暴力美學，如果仲係幾十年前嘅港產片我都仲可以理解，但以今時今日電影水平黎講的話，就係不能接受囉
•最後，響我睇呢套戲嘅時候，總有一樣嘢係令我感覺格格不入，但又講唔出係乜，跟住一去到出字幕嘅時候，突然出現一啲懶係溫馨、懷念Good old days嘅「小店片段」（我要強調呢一幕其實我覺得係幾有新鮮感，我係幾鍾意），個腦就突然叮一聲醒起個問題響邊：就係無論成套電影點樣強調個環境有幾up dup、林峰著啲衫有幾爛身爛勢，點都係少咗一浸當年《古惑仔》果種黑社會兜mou感。當然套戲入面都有講呢班友根本唔係黑社會，但當日陳耀南同山雞呢兩個角色之所以出倒位，就係因為果種囂張狂妄嘅感覺，但入面果幾個主角，卻只係似一班樂於助人嘅文青only，然後無啦啦話佢地會立刀斬人，成件事就係好違和囉
•之前我講過《九龍城寨》漫畫版成功嘅地方係將日式美少年融入古惑仔式劈友故事，但電影版想將果種文青感覺融城寨，我自己卻係覺得完全失敗，因為江湖片之所以係江湖片，就係要有一種為求生存上位嘅戾氣存在。而當你一味響入面強調街坊點樣溫情洋溢、守望相助，平時小店點樣勤勤懇懇，咁不如唔好講劈友收陀地，改拍《麥難民》、《白日之下》算尻數啦
•當然我又要話說回頭，劇本垃圾唔代表套戲會唔好睇，事實上我之前介紹嘅《Seed Freedom》、之後會講嘅《淚之女王》，都係劇本垃圾而又值得一睇嘅。甚至連《Ripley》個劇本都係偏老土架啦，其他嘢搭夠咪無問題囉。總括黎講我甚至覺得《九龍城寨》係比《臨時劫案》好睇，有75分以上
港產片除非攞牌否則唔屌得，以前都仲係話人地經已拍得好努力，而家直頭情緒勒索你唔入場港產片死咗你就係兇手
•但好神奇嘅係，原來今時今日響香港評論港產片，當大眾一致覺得係好戲嘅時候，就連少少嘢都唔撚屌得，即係我都經已係好低調咁唔開名講句「一流電影配上九流劇本」，咁都要比班死忠粉屌尻我「自以為看破世情的評論」：哦原來只要你覺得好，套嘢就一撚定係完美、一撚定無可挑剔，仲撚惡過共慘黨
•當然我都會遇到有人會將我心目中覺得完美嘅作品，被彈到一文不值嘅時候，例如早排就有Friend彈《周處除三害》中間果段拍得又慢又垃圾（Which我係好鍾意呢段），又有Friend竟然同我講《大熊餐廳》又悶又唔好睇，咁我就只能講句「唔識欣賞無謂勉強」。最撚痴線卻係，而家班港產片原教旨義者，經已唔單止係講緊評分優劣咁簡單，而係覺得自己充當港產片（其實係中港合拍片）嘅守護天使，批評經已唔係口味差別嘅問題，而係黃屍狗口中嘅「本土電影分化撚」
•即係你當然可以鍾意《九龍城寨》，正如我都可以鍾意好多水平一般嘅電影，但你連套戲「劇本唔得」呢個咁明顯嘅缺點都睇唔出或者接受唔倒批評呢點，咁就只能夠響我心入面講句：「你其實就係唔撚識睇戲」囉。記得當初有人批評港產片，班護法都仲只係話「人地經已拍得好努力，點解唔比多少少寬容支持下」，估唔撚倒去到今日你批評，唔止比人屌番轉頭話你「自以為看破世情」，仲要誇張到加多句「如果連呢套戲你都唔入場，他日港產片死咗你就係兇手」──呢句唔係我尻吹出黎，而係真係由某影評KOL親口講出
•結果今時今日你要屌港產片要好似煽動罪國安法咁，先及一及有無人做爛頭卒開聲屌先，然後發現屌完安全無問題就可以加多腳踩撚死隻過街老鼠，例如《十二大盜》就係例子；至於有啲危險嘅例如《飯氣攻心2》就要透過上下其手操作，例如當日好多人吹捧《臨時劫案》，其實個目的就係暗踩前者呢套同期賀歲片。至於去到《白日之下》、《九龍城寨》啦喎，屌佢個風險基本上就同你支持港獨、講光時五缺口號無分別，我個Friend選擇借住讚《城寨英雄》黎暗踩《九龍城寨》故事唔掂，但佢竟然話一套「港產片聖牛」唔及一套TVB劇好睇，相信佢結局都係死得好慘……// |
